“Azərbaycan Respublikasının 2022-2026-cı illərdə sosial-iqtisadi inkişaf Strategiyası" çərçivəsində İqtisadi İslahatların Təhlili və Kommunikasiya Mərkəzində növbəti illər üçün nəticə indikatorları üzrə hədəf göstəricilərinin dəqiqləşdirilməsi istiqamətində aidiyyəti dövlət qurumlarının nümayəndələri ilə görüşlər davam edir.

Bugünkü görüşlərdə Azərbaycan Respublikasının Əqli Mülkiyyət Agentliyi, Azərbaycan Milli Elmlər Akademiyası, Azərbaycan Respublikasının Maliyyə Nazirliyinin rəsmiləri iştirak ediblər.

Görüş zamanı Əqli Mülkiyyət Agentliyi ilə əqli mülkiyyət hüquqlarının beynəlxalq səviyyədə qeydiyyatının stimullaşdırılması, eləcə də effektiv patent qeydiyyatı prosedurlarının qurulması və əqli mülkiyyət hüquqları ilə bağlı məlumatlılığın artırılması üzrə həyata keçirilməsi planlaşdırılan məsələlər müzakirə olunub. Azərbaycan Milli Elmlər Akademiyası ilə görüşlərdə elmi tədqiqatların və innovasiyaların inkişafının, elm və təhsilin inteqrasiyasının təmin edilməsi haqqında vacib məsələlərə dair fikir mübadiləsi aparılıb. Bununla yanaşı, görüşlərin davamı olaraq, Maliyyə Nazirliyinin nümayəndələri ilə fiskal tənzimləmənin təkmilləşdirilməsi çərçivəsində müəyyən edilmiş tədbirlər istiqamətində vacib məsələlərə diqqət yetirilib, növbəti illər üzrə müəyyən olunacaq hədəflərin icrası üçün müvafiq istiqamətlər qeyd edilib.

Görüşlərin yekununda Strategiya üzrə növbəti illər üçün hədəflərə müvafiq qaydada nəticə indikatorlarının formalaşdırılması istiqamətində qurumlara tövsiyələr verilib.