Prezident İlham Əliyev “Azərbaycan Respublikasında rəsmi statistikanın inkişafına dair 2026–2030-cu illər üçün Dövlət Proqramı”nın təsdiq edilməsi haqqında Sərəncam imzalayıb.

Sərəncama əsasən, sosial-iqtisadi inkişaf sahəsində dövlət siyasətinin prioritet və məqsədlərinə nail olunması, strateji sənədlərin hazırlanması və icrasına nəzarətin gücləndirilməsi, eləcə də rəsmi statistika məlumatlarına artan tələbatın ödənilməsi məqsədilə 2026–2030-cu illəri əhatə edən Dövlət Proqramı təsdiq edilib.

Dövlət Proqramının həyata keçirilməsinin əlaqələndirilməsi Azərbaycan Respublikasının Dövlət Statistika Komitəsinə həvalə olunub. Komitə proqramda nəzərdə tutulmuş tədbirlərin icra vəziyyəti barədə ildə bir dəfə Prezidentə məlumat təqdim edəcək.

Dövlət Proqramının icrasının monitorinqi və qiymətləndirilməsi Azərbaycan Respublikası Dövlət Statistika Komitəsinin sifarişi əsasında İqtisadi İslahatların Təhlili və Kommunikasiya Mərkəzi tərəfindən həyata keçiriləcək.

Nazirlər Kabineti Sərəncamdan irəli gələn məsələlərin həllini təmin etməlidir. Maliyyə Nazirliyi isə Dövlət Proqramında müəyyən edilmiş tədbirlərin maliyyələşdirilməsi üçün hər il dövlət büdcəsinin tərtibi prosesində zəruri maliyyə vəsaitinin nəzərdə tutulması istiqamətində müvafiq tədbirlər görəcək.