“Azərbaycan Respublikasının 2022–2026-cı illərdə sosial-iqtisadi inkişaf Strategiyası”nda nəzərdə tutulan dayanıqlı artan rəqabətqabiliyyətli iqtisadiyyat üzrə hədəfə nail olunması məqsədilə yaradılmış “İqtisadi artım” işçi qrupunun növbəti iclası keçirilib. İclasda Strategiyanın 2025-ci il üçün hədəflərinin icrasına dair monitorinq və qiymətləndirmə nəticələri müzakirə olunub.

İclasda çıxış edən işçi qrupun sədri, iqtisadiyyat nazirinin müavini Səməd Bəşirli ölkəmizin sosial-iqtisadi inkişaf Strategiyası üzrə tədbirlərin reallaşdırılmasının dayanıqlı və rəqabətqabiliyyətli iqtisadi inkişafa nail olunmasında rolunu vurğulayıb. Nazir müavini işçi qrupunun fəaliyyət istiqamətləri üzrə tədbirlərin icra vəziyyətini, İqtisadiyyat Nazirliyinin əsas icraçısı olduğu tədbirlər üzrə görülmüş işləri diqqətə çatdırıb.

İqtisadi İslahatların Təhlili və Kommunikasiya Mərkəzinin icraçı direktorunun müavini Təranə Salıfova və Mərkəzin Monitorinq və qiymətləndirmə şöbəsinin müdiri Orxan Sadıqov Strategiya çərçivəsində 2025-ci il ərzində görülmüş işlərə dair monitorinq və qiymətləndirmə hesabatını təqdim ediblər.

İcraçı qurumların nümayəndələri ilə hesabat dövründə qeydə alınan məsələlər müzakirə edilib, növbəti dövr üçün əsas hədəflər müəyyənləşdirilib.