“Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” nın (bundan sonra-Dövlət Proqramı) Azərbaycan Respublikasının Prezidentinin 16 noyabr 2022-ci il tarixli 3587 nömrəli Sərəncamı ilə təsdiq edilib. Dövlət Proqramının təsdiq edilməsi haqqında Azərbaycan Respublikasının Prezidentinin 16 noyabr 2022-ci il tarixli 3587 Sərəncamının 4-cü bəndinə əsasən, Dövlət Proqramında nəzərdə tutulmuş tədbirlərin icrasının monitorinq və qiymətləndirilməsi, Azərbaycan Respublikasının Nazirlər Kabinetinin sifarişi əsasında, İqtisadi İslahatların Təhlili və Kommunikasiya Mərkəzinə (bundan sonra-Mərkəz) tapşırılmışdır.  Azərbaycan Respublikasının Prezidentinin 16 noyabr 2022-ci il tarixli 3587 Sərəncamının icrasının təmin edilməsi barədə Azərbaycan Respublikasının Nazirlər Kabinetinin 30 dekabr 2022-ci il tarixli 815s nömrəli Sərəncamı imzalanıb. Nazirlər Kabinetinin 2022-ci il 30 dekabr tarixli Sərəncamının 1.1  və 1.2-ci bəndlərinə əsasən, nəzərdə tutulmuş tədbirlərin icrası üzrə işlərin gedişatına nəzarətin effektivliyinin təmin edilməsi məqsədilə “Azərbaycan Respublikasının 2022–2026-cı illərdə sosial-iqtisadi inkişaf Strategiyasının monitorinq və qiymətləndirmə Portalı” yaradılmışdır. Dövlət Proqramının monitorinqi və qiymətləndirilməsi Azərbaycan Respublikasının Prezidentinin 2021-ci il 6 mart tarixli 1294 nömrəli Fərmanı ilə təsdiq edilmiş “Dövlət Proqramlarının tərtibi, icrası, monitorinqi və qiymətləndirilməsi” Qaydasının tələblərinə uyğun aparılır.